نصيحة بجد يا جماعه...الي عاوز يعمل حاجه بلاش ياخد رأي حد...يا أما ياخد رأي واحد ناجح في مجاله....و ناجح مش معناها انه "متوظف" لا معناها انه سعي لهدف و وصله....لأن كم من أفكار اهدرت أو راحت علي الواحد بسبب انه اخد رأي حد و قاله لا لا متنفعش.... مش feasible.... ايه ال اي كلام ده....و يمر الزمن و تكتشف انها كانت تنفع عادي....بل و غيرك عملها بس انت لو كنت عملتها زمان كان هيبقي ليك السبق....للأسف في ناس اسهل حاجه عندها كلمة مينفعش....و بالمناسبة دي احب اقولوكوا انه ان شاء الله مفيش حاجه مينفعش تتعمل....و كل حاجه في ايدك و ادامك في الدنيا دي كانت مجرد احلام في دماغ اصحابها و جايز كمان لما عرضوها علي الناس ضحكوا عليهم و سخروا منهم!
يقال ان مخترع التلفزيون اتقاله دول هما حبيتين و الناس هتزهق من القعدة ادام صندوق محطوط ادامهم في البيت! مش هعلق بس هسيبكوا انتوا تعلقوا:)
متديش ودنك للسلبين عشان مترجعش تندم....كمان بقي رساله لإخوانا السلبيين....سيبوا الناس في حالها...معلش اعتبرهم مجانين و ربنا يشفيهم سيبوهم يحلموا و يطلعوا بأحلامهم في السحاب....خاليكوا انتوا عاقلين و راسيين....بس بلاش تبقوا سبب في فشل أو تأخر حد...
من الحاجات الي الواحد حس بمعناها قوي حديث النبي (ص): الكلمة الطيبة صدقة....اه و الله صدقة....لأن ساعات تبتلي انك تقعد مع حد من السلبيين دول و يبث أفكاره السلبية في نفوخك و انت بتبقي رافضها طبعا من جواك لكن تلاقي نفسك قعدت يومين تلاته في صراع نفسي مع الكلام السلبي الي سمعته.....عامل زي الي اخد حقنة...اه الحقنة مش بتوجع قوي يعني بس ممكن تقعد كذا يوم مكانها واجعك وجع سخيف...
و علي فكرة السلبين دول مش بيطلعولك بس في احلامك:) دول كمان في ابسط الأمور اليومية تلاقيهم يقولوك لا بلاش....مفيش داعي....ده اصلا مش كويس.....اي حاجه توقفك و خلاص....زي المطب الصناعي الغلس....اعوذ بالله!
#كلام_بصراحه
#الحق_ميزعلش
#حاسب_المطب
ليست هناك تعليقات:
إرسال تعليق