تيتانيك

ماذا تعرف عن تيتانيك؟ طبعا مش الفيلم...المركبه....مره كده قلت ليه المركب دي مشهوره كده....فبحثت كده و بصراحه اكتشفت حبة معلومات.....كلمة تيتانيك في الاساس معناها المارد......و اتسمت بالاسم ده لتلت اسباب.....ضخامتها و فاخمتها و عدم قابليتها للغرق:).....فتيتانيك أكبر باخرة نقل ركاب في العالم في هذ الوقت "1912"....و كان ساعتها الناس عندها قناعه انه فعلا السفينه دي مبتغرقش.... مش ممكن تغرق....مش بس لان امهر المهندسين هما الي بنوها و استخدموا تقنيات متقدمه كمان عشان المفروض ان فيها اعلي معايير السلامه....بالسلامه يا حبيبي بالسلامه:)..........المهم انها خبطت في جبل جليدي و غرقت و غرق معاها 1519 شخص......اغلب الي غرقوا من الفقراء لانهم كانوا في الدرجه الثالثه....تحت خاااالص في السفينه....و اغلب الي غرقوا برضوا الرجاله لانه نزلوا النساء و الاطفال الاول و دي كانت اوامر قبطان السفينه....تلاقي برضو معلومات غريبه....يعني الصفارات بتاعة السفينه كان ممكن تتسمع من علي بعد 11 ميل........طول التايتانك تقريبا مساوى لطول مبني امبير استيت ناطحة السحاب الامريكيه الي ظل اطول مبني في العالم لمدة 40 سنه.......مكانش متوقع ان سفينه ركاب خاصة انها بالحجم ده تغرق في خلال ساعتين تقريبا....و اعجب حاجه ان خبراء السفن لحد النهارده شايفين انها كانت من اكتر السفن الي عرفتها البشريه امان.....تخيلوا ان في موقع علي النت مكرس للمعلومات عن تيتانيك و عن الركاب في كل درجه...كل المعلومات الي ممكن تتخيلها....و ممكن في حتت كتير تلاقي احصائيات و صور و تفاصيل عن كل بني ادم مات....الي خلاني اصلا فاكر في تيتانيك....عبارة السلام 98 الي غرقت باكثر من 1000 بني ادم....من اصل 1415 بني ادم....الي كانت معاها رخصه للعمل لحد 2010 و هي غرقت اصلا في 2006....الي كان ناقصها معايييير كتييييره للسلامه و الي الركاب قالوا ان القبطان اول واحد ساب السفينه و مشي و ساب الركاب....و خد مركب هو و كام واحد من مساعديه يكفي 30 بني ادم.......اهم حاجه ان اسكتلندا هي الي لقطت إشارات استغاثه من السفينة وحاولتها لفرنسا الي نقلتها لمصر الي قالتلهم لا ده مفيش حاجه:).....و في جلسه 15 دقيقه تم تبرئه جمييييييييييييييييييييييييييع المتهمين من غرق 1000 بني ادم.....طب يا جدع طول الجلسه شوايه.....و بعدين العباره هي الي كانت ماشيها وحش عشان كده غرقت.....ربنا يهدي.....ربنا يرحمهم و يصبر اهلهم.....حتي لا ننسي.......
جميع المعلومات مصدرها الموسوعه الحره.....

بيئه

قريت معلومه مره بتقولك ان متوسط استهلاك المياه في اليابان بوميا هو 99 لتر للفرد و ده يعد تقريبا من اقل -ان لم يكن هو في ذاته الاقل علي الاطلاق- الكميات علي وجة الارض...يعني هما من اكثر الشعوب ترشيدا للمياه....و طبعا كلنا عارفين ان الجماعه اليابانيين دول.....منظمين و نضاف و و و مييزات كتيره جدا....المهم كنت بستحمي عقبال عندكوا كده:) فقلت اسد البانيو و انا بستحمي و اشوف الميه هتوصل لفين......طبعا انا غالبا استحميت بحوالي 60 لتر علي الاقل....لقيت الميه يا اختي وصلت لركبي قلت كفايه كده بقي احسن اضحك اليابانيين علي:)....99 لتر بس طب ده انا لو غسلت اسناني و شربت ميه و شاي و عصير مع الدش المتين ده....هقفل ال99 لتر مستريح:).......


هو ليه احنا مبنعرفش نستخدم الميه صح؟ ليه في كده حاجات الواحد بيحس انها مش عندنا في بلدنا.....يعني غير ترشيد المياه....ليه معندناش وزارة بيئه حقيقيه - مش اراجوز - و لا احنا معندناش بيئه؟ طب ده نص الشعب بيئه:)....مش لازم يهتموا بالناس البيئه دي و لا ايه؟:))))) و انا اول واحده بيئه و عاوزه اهتمام عشان ابقي خضرا.......و طبعا خضرا دي بتفكرنا ببرنامج صباح الخير يا مصر و الفقره الزراعيه الي كلنا شوفناها كل يوم الصبح قبل ما نروح المدرسه.....الارض الي في الصحرا عاوزينها تبقي خضرا و نقدمها لمصر هديه حاجه جميله و معتبره.............و ليه الاعلام مستفز....و ليه بيوجه الكاميرا بتاعته علي حاجات كتير بتبقي بعيده عن الشعب و مشاكله...و لا هي الكاميرا بتاعة الاعلام مبتتكلمش الا في الليبراليه المهلبيه و المدنيه اللولبيه.......علي اساس ان هي دي مشاكل و اهتمامات الشعب....يعني البواب مثلا اهم حاجه عنده اكيد اهم من لقمة عيشه و الاوضه الي قاعد فيها هو و مراته و الخمس عيال الي تحت السلم اهم حاجه ان مصر تبقي مدنيه طبعا:))) و طبعا البيه البواب ليبرالي جدا:) و اكبر دليل سايب ابنه الصغير بالشورت في عز البرد تطبيقا لمبادئ الحريه الشخصيه:)


بلاقي واحد راكب عربيه غاليه جدا و بيرمي زباله في الشارع....اهم حاجه انك تبقي عربيتك نضيفه يا ريس انت اهم حاجه انما الناس البيئه -زي ما قلتلكوا قبل كده - مش هيزعلوا من الزباله:) عجبتني قوي قصه قريتها واحد واقف في اشاره و رمي حاجه في الشارع كالعاده....راحت واحده ست جاياله و جابت العلبه الي رمها و بتقوله حضرتك مش عاوز دي قالها لا قالتله و لا احنا كمان و راحت رامياها جوه عربيته:) جدعه و الله:)...........


احنا محتاجين نغير ثقافة الشعب عن حاجات كتير.......ده المهم...

الدفايه

بمناسبة اننا اشترينا دفايه (ديلونجي مش اي كلام يعني:))......اقدر اقولكوا ان الصديق ده عامل زي الدفايه طول السنه مش محتاجها و ممكن يجي الشتي و برضو متحتجهاش.....ممكن متهتمش بيها قوي طول السنه.....لكن يوم اما تقولي بررررررررررررررررررررررد بتطلعيها و تشغليها و تقعدي جانبها او حتي بعيد عنها حبيتين و هي تشتغل و تدفييك.......(اسالوني انا الدفايه جانبي اهي زي الفل :) )

في ناس كده بقي زي الكراكيب.......جانبك علي طول و مش عارف هي بتاعة ايه....غطا قلم ضايع مثلا....تفضل شايله علي مكتبك سنين...يمكن ينفعك و عمره ما بينفع....و يمكن يوم ما تحتاجه متلاقيهموش........ضاع.....مش بقولكوا كراكييييييييييييييييب.......

الناس الدفايه هي الي جدعه مهما طال الفراق و الناس الكراكيب هي النادله مهما تطول الصحبه! و عجبي:)

عامة........انك تخاف علي نفسك....شئ طبيعي بالفطره....انك تبقي عاوز مصلحتك.....شئ برضو طبيعي..... و برضو بالفطره.......انما انك تبقي جدع.......ده اختيار.......و هو الاختيار الصعب...................او سميه الاختبار الصعب.....يعني الخلاصه متعملش زي المثل الشعبي الي بيقولك الجري نص الجدعنه.......لا و مره سمعت واحد بيقولك و النص التاني - طبعا من الجدعنه - ان محدش يحصلك:)........و للاستاذ ده بقوله لا حضرتك دي كده مش بس نداله دي زباله..........

خاليك انت الدفايه.... تخلص من الكراكيب الي حواليك.......عشان الدنيا حواليك تنضف:)

جولييت2009

طبعا كل واحد مننا عنده في حياته لحظات كده اما يتكلم عن نفسه لازم يحكيها......,و دي واحده منهم:)......مره كنت سايقه عربيتي الجولييت النبيتي و حفصه كان عندها حوالي سنه و نص....المهم كانت الساعه سبعه و نص صباحا و كنت سايقه علي طريق السويس فايقه و رايقه و كعادتي احب اتامل و افكر...فسالت نفسي سؤال هو ليه الناس بتعمل حوادث؟ عشان اتفادي الاسباب الي بتؤدي لحاجات زي كده....اه المشي البطال:) هي اخرة المشي البطال كده اكيد بيسوقوا بسرعه:)))))......بووووووووووووووووووووووووووووووم حادثه شكرا....لا هما مش بيبقوا ماشيين بسرعه بس هما بيبقوا كمان سرحانين:)))....اتاري في عربيه واقفه و وراها واحده تانيه مشغاله فلاشر و انا من توهاني افتكرتها بتهدي....متسالونيش ازاي اخدت بالي في اخر لحظه و فرملت بس كان توو ليت:(........المهم لما خبطت الفولكس الصغيره الي ادامي نطت و خبطت في الي ادامها.... و الاتنين نزلوا يبصوا علي علي عربيتهم و من ستر ربنا طلع محدش فيهم جراله حاجه الا انا:)))) انا شايفاهم و بقي مقفول من الذهول و البت حفصه بتعيط.....و كل الي في دماغي هو الراجل وقف فاجاءه ليه؟!:).......المهم الراجل الاولاني مشي و التاني جه يتكلم معايا بيقولي حضرتك كويسه يا مدام....و انا ابصله و مش عارفه افتح بقي.....يا مدام......حضرتك كويسه.....متلاقيش:).....يقوم الراجل تقريبا ال فاكرني مش عاوزه اكلمه عشان منتقبه و بتاع راح باعتلي بنته.....حضرتك كويسه....مش قادره انطق......فضل هو و بنته رايحيين جايين علي العربيه لحد ما حاسوا اني شاكلي غالبا كويسه........انا كل الي قدرت اقوله في الفتره دي اني اقول لحفصه بصعوبه ايه يا حبيبتي..........بصوت هي غالبا من صويتها مسمعتهوش:).......المهم الراجل اتكل علي الله و انا فضلت للحظات كده متنحه و بدات افوق..... عربيتي بقيت هاتش باك من ادام...هاتش فرونت يعني...............المهم كنت قريبه من بيت اهلي....و موبيلي اي زفت اي فون مش سهل مع الجوانتي عشان تاتش........حاولت اتصل و انا بترعش بكلم اخويا.....قلته و انا بحاول ابان طبيعيه: احمد...ازيك عامل ايه؟ (عشان ميتخضش)...رد: الحمد لله....قلت: بص هو احنا كويسين بس انا عملت حادثه....هو: طيب هاتيجي و لا اجي اخدك....-كانها حاجه عاديه و لا انا كل يوم بادخل عليهم بحادثه؟! و لا مصايبي كتييييييييييييير مش عارفه- قلتله: لا لا انا هاجي خلاص (علي اساس اني كنت مكلماه ادردش معاه كده عشان افصل:)) و سقت العربيه الي بقيت شكلها عظه و الناس عماله تبص عليها في الشارع و انا ايدي بتترعش....و بحاول اتمالك نفسي لحد ما وصلت.....و فشلت اني اركن مش قادره اظبط الناقل بتاع السرعه مش فاكره اسمه ايه.....ايدي سايبه خاااااااالص....الحمد لله.....و هي دي اخرة التوهاني الي انا عايشه فيه....:)))).......ربنا يكرمك يا بابا طول عمره بيقول ساره مبتعرفش تركز الا في حاجه واحده مبتعرفش تعمل حاجتين مع بعض:)

بنت الحلال

و انا في الجامعه, كانت دماغي صغيره قوي....و لحد قريب:) كنت مش فاهمه حاجات كتير جدا من حواليا, خاصة في التعامل مع الناس.....التعامل مع الناس محتاج خبره.....و علي العكس كان عندي اصحابي فاهمين قوي التعامل بين الناس....بيفهموا الي قدامهم كويس و بيفهموا ما بين السطور....الي ساعات بيكون سطر بحاله و بكون برضو مش واخده بالي منه اساسا!!!
انا فاكره مره كنت حزينه جدا (حزيمه بلغة حفصه بنتي) لأن في واحده ضيقتني بتصرفاتها و كمان اخدت مني صاحبتي, طبعا اخر تلت كلمات دول هيخلوكوا تقولوا عليا غبيه....بس بجد ساعتها كان هو ده احساسي.....البنت ضيقتني و كمان اخدت اعز اصحابي واحده بواحده لحد ما بقيت شبه بجري ورا صاحبتي.....خالتها تتهبل بيها كده و تقلدها و تسمع كلامها و تشغلها عني بأي طريقه....المهم كنت ماشيه حزينه علي صديقتي انها خلاص راحت مني فقعدت اتكلم مع واحد بنت حلال و حكيتلها قالتي ساره...يعني ايه اخدت صاحبتك؟! كل واحد عارف هو بيعمل ايه....صاحبتك هي اختارت كده....و بعدين بصراحه انا لاحظت ان قليل جدا ما بين البنات ان تلاقي واحده بتعامل التانيه كويس........ساعتها انا حسيت باستغراب من كلامها....بجد؟! طب ليه؟
قليل جدا ما بين البنات ان تلاقي واحده بتعامل التانيه كويس؟!؟!؟!؟ كلمتها دي لحد النهارده بترن في ودني.....ممكن دلوقتي عشان اغلب اصحابي متدينين مش حاسه بكده قوي بس برضو فعلا ساعات بلاقي الجمله دي صحيحه بامتياز.......
المهم الزمن جري و بنت الحلال دي فاجاءه عملتها هي كمان....و اتعاملت معايا كذا مره باسلوب مش الي هوا:) هو احنا لسه اصحاب و بحبها جدا لان في جوايا تجاهها مشاعر و ذكريات حلوه حتي لو مش بنتكلم كتير خالتني استحمل منها ده..............و صاحبتي الي راحت حاولت معاها كتييييير و بطلت ازعل او اضايق.....الحمد لله......

كل حاجه!

زمان هو مش زمان بعبد قوي يعني......اما كنت بعلم حفصه -بنتي- تنام في سريرها كنت بفضل جانبها وقت طوييييييييييييييييييييل لحد ما تنام و بصراحه استفدت من الوقت ده جدا لاني كنت بفكر و ادبر و اتامل في حاجات كتيييييييير.....الوقت الي كنت بنيمها في حوالي ساعه كل يوم فعلا فرق في دماغي و تفكيري و شخصيتي جدا....
المهم في مره من المرات مش عارفه كنت بفكر في ايه كده لقيت نفسي وصلت للفكره دي:: ان اغلب الحاجات الي الواحد بيعوزها في حياته مش بياخدها......هو بياخد حاجات محدده فقط..........عادي يعني كلنا عاوزيين حاجات كتير جدا و ممكن تلاقينا امانينا متشابهه....لكن في النهايه غالبا مش بتاخد الي انت عاوزه بالظبط و كمان مش بتاخد كل حاجه..........الفكره دي لما تبقي في دماغك طول الوقت هتبقي سعيد باي حاجه في حياتك حقيقي.....هترضي كده و تهدا......و علي فكره الموضوع مالهوش علاقه بالفلوس اطلاقا حتي عم الغني صاحبك مش بياخد كل الي هو عاوزه من الدنيا....ممكن مثلا يبقي نفسه ان فلان يبقي صاحبه...... و لكن ميبقاش.....افتكر دايما هي حاجات محدده فقط الي هتاخدها......

الخلق الضيق

اوحش حاجه للواحد ان خلقه يبقي ضيق. حقيقي هو ممكن يكون مش حاسس خالص بالمشكله لكن هو فعلا بيفوته كتيييييييييير. الواحد اما خلقه يبقي ضيق تلاقيه علي طول متسربع كده و مستعجل لدرجة ممكن يخليك مش علي بعضك و انت معاه و يخليك تبقي عاوز تتجنب انك ترتبط بيه في اي مشوار لانه هيوترك هيخليك بتجري خوفا من انه يفقد اعصابه عليك:) طبعا بالتالي هتبقي قلقان لو لقيت نفسك ارتبطت بيه لاي سبب في مشوار. النوع ده لو اتاخرت عليه هيشبشبلك و لو حاس انك بطيئ بالنسبه له ممكن يديك كلمتين من تحت لتحت ما انت صاحبه برضو:)
عامة مش هي دي اكبر مشكله......المشكله الكبيره للانسان ده -اخونا ابو خلق ضيق- انه مبيعرفش يستمتع بحياته و لا يستمتع بالحاجات الصغيره الي حواليه. مبيقدرش حاجات كتير و بالتالي بيفوته برضو لحظات كانت ممكن تسعده قوي. يعني مثلا تلاقيه نازل معاك خارجين تتفسحوا -طبعا ده من وجهة نظرك- تلاقيه كانه بيقضي مشوار.....متسربع و متعككن و عاوز يوصل بسرعه عشان نتنيل ناكل و نمشي:) و برضو يا عيني لو جيبتله هديه! هيصدمك ايه ده الله مج - كوبايه- شكرا ربنا يكرمك و يرمي ورا ضهره اول ما تمشي:)
ان شاء الله عقبال ما خلقي يوسع كده هكملكوا حاجه كمان جات في دماغي.....لاحظت برضو ان ابو خلق ضيق ده مبيعرفش يلعب مع اولاده...او بمعني ادق مش بيحب.....لا يحتمل....و ده شئ مش ظريف طبعا لانه المفروض اللعب مع الاولاد بيعلمهم كتيير و في نفس الوقت بيسيب اثار كويسه عند الاطفال.
انا و انا بتكلم عن الخلق الضيق في فعلا شخصيتين من النوع ده في دماغي واحده منهم هي و بلا فخر انا:)
عامة الكلام ده ممكن نطلع منه بان سبب حاجات كتير في حياتنا هي ......الخلق الضيق!