البواخه!

هذا الكتاب الصغير الكبير!....who moved my cheese او بالعربي مين الي حرك الجبنه بتاعتي من مكانها؟ كنت قرأت عن الكتاب ده انه حقق ارقام مبيعات رهيبه و انه فعلا معبر و مؤثر جدا المهم وقع في ايدي في يوم من الايام...لاقيته بيتكلم عن تأقلم الانسان مع المستجدات في حياته او بمعني اخر التأقلم مع التغيير و التغيير من اجل التأقلم...هوعباره عن قصه بتحكي تصرف الانسان تجاه التغيير و ازاي ده بيأثر علي حياته بالسلب و ازاي المفروض يتصرف و يتغير و انه كل ما تأقلم اسرع كل ما الامور هتمشي اسرع....انصح الجميع باقتناء و قراءة هذا الصغير الكبير...

المهم الكتاب ده فكرني بحاجه كلنا بنمر بيها...ساعات تصحي الصبح تلاقي نفسك اخدت قرار غلط في حياتك...تلاقي نفسك "متورط" كده في حاجه مش عارف ليه و ازاي....يعني مثلا تلاقي نفسك ف سنه رابعه طب و تكتشف انه مش دي الدراسه الي كنت عاوزها...او تتجوز و تكتشف ان الجوازه دي مش مناسبه حقيقي....او مثلا تمشي في سلم وظيفي career و بعدين تكتشف ان مش ده الشغل الي كنت بتتمناه....يعني من الاخر تختار اختيار في حياتك و تمشي فيه شوايه و بعدين تلاقي نفسك ندمان او مش مقتنع بالي انت بتعمله...

اغلب الناس في المواقف دي بيقرر انه يحاول انه يستمر و يصلح الوضع علي قدر الامكان يعني مش معقول بعد 4 سنين طب تروح محول علي كلية فنون جميله مثلا و بعد ما كان اسمك هيبقي دكتور عاوز تصحي الصبح تبقي من غير لقب!....فبتحاول تستمر في دراستك و تخلصها و تعمل ماجيستير و دكتوراه و تفتح عياده و بعدين بعد قيمة 20 سنه كده تيجي اللحظه الميمونه انك "تصحي الصبح" و تقول انا عمري ضاع و معملتش الي نفسي فيه بس طبعا بيبقي الوقت متاخر قوي و بتبقي مضطر انك تكمل....مضطر انك تستمر و مفيش مانع ابدا انه من حين لحين يرادوك شعور بالندم انك مرجعتش في الطريق من بدري....

في لحظات في الدنيا بيسموها now or never يعني يا دلوقتي يا مفيش نهائي....بمعني انه و انت في سنه رابعه طب اسهل عليك و اكثر منطقيه انك تحول لفنون جميله من انك تستني 20 سنه و تبقي دكتور كبير و عندك عياده و عيانين و بعدين تاخد قرار زي ده...يا دلوقتي -و انت في رابعه طب- يا تشيل الموضوع من دماغك....

سهل قوي انك تدلق ربع كوباية ميه او نص كوبايه او حتي كوبايه بحالها....لكن صعب انك تمسك جالون 18 لتر و تدلقه في الارض....نفس الشئ في قراراتك الي اخدتها و مشيت فيها شوط.....now or never...يا تدلق الكوبايه و تبقي خساره بسيطه يا اما تنسي الموضوع...بس كده!

دايما لما تيجي تاخد قرار حط الوقت في اعتبارك....و رايح دماغك! كل ما كنت في الاول يبقي ممكن تغير موقفك بسهول و كل ما الموضوع طول و الي راح من العمر اقل من الي فاضل بتبقي خلاص اتورطت و القرار مبقاش في ايدك و فكرة التغيير اصبحت لونا من البواخه!....

القفا:)

في ذات يوم من الايام و انا في الجامعه و احنا في سيكشن اللغه الالمانيه....و احنا مندمجين و مركزين كده و الشمس ساطعه و داخله من الشباك...اذ بنا نتفاجئ بشاب خفيف يصيح في صاحبه الي قاعد عند الشباك قائلا: متعرضش قفاك للشمس!.....طبعا واضح انه كان بيرخم عليه ال يعني حريص علي قفا صاحبه.....

القفا عند المواطن المصري له معاني كتيره و عظيمه الصراحه...و الضرب علي القفا و الاخد علي القفا معلم من معالم الغباوه في الثقافه المصريه...حقيقي يعني....مش عارفه اشمعني القفا يعني الي مميزينه بكل الاهميه دي؟! يعني كل واحد بيحس بمسئوليه انه يحافظ علي قفاه:)....و الضرب علي القفا نوعين...حسي يعني حقيقي و معنوي...يعني تبقي في وضع كده كانك اضربت علي قفاك....فالقفا ايها الساده رمز للاستخفاف و السذاجه و الهبل.....

ساعات بقي الواحد مننا بيختار ان يدي قفاه للي رايح و الي جاي....يفتح قناه من القنوات الي في بالك و يقعد كده سايبلهم قفاه  يهولوه عليه شوايه و يطبطبوا:)....كم انت عظيم ايها المصري:)......

اما اجي اتكلم عن الاعلام....يبقي بتكلم عن فساد المفاهيم.....مش الاعلام ده بيشكل ثقافة البشر؟.... اه جزء كبير من الثقافه بتاعة الناس بتتشكل من خلال الاعلام.....حتي اكتر من التعليم و القراءه....و اخطر ما في الاعلام انه بيشكل مفاهيمك و انت مش واخد بالك...من تحت لتحت...سواء بالايجاب او بالسلب....لكن للاسف في الغالب بالسلب.....ممكن يدس سمومه و انت بتتفرج علي حاجه كوميدي مثلا و بتضحك....فتعجبك....

خالفيتك و دي طبعا جزء من عقلك ركز معايا و سيبك من قفاك دلوقتي.....خالفيتك و وجهات نظرك فعلا الاعلام بيشكلها و انت مش حاسس...مش ساعات كده تشوف واحد و تحس ان قلبك مقفول تجاهه من غير سبب؟ و ساعات تشوف واحد تاني و تحس انك مستريحله و متبقاش عارف ليه؟ نفس التأثير ده ممكن الاعلام يعملوا.....جزء كبير من ده هو المعلومات الي الاعلام سجلها في عقلك الباطن....ايوه هنيمك بالمغنطيس دلوقتي:)....عقلك الباطن بيلاحظ حاجات انت شخصيا ماخدتش بالك منها و يشلها و وقت اللزوم يطلعها.... كل حاجه بتشوفها علي هذه الشاشه الصغيره او الكبيره علي حسب الLCD الي عندك كام بوصه:))).... فعلا بيأيثر فيك و المشكله انك مش متخيل مدي خطورة ده....

تعالوا ناخد مثال...بعد مسرحية مدرسة المشاغبين الي دمرت اجيال...بقي شئ مستساغ و مضحك في المجتمع ان الطالب يقل ادبه مع المدرس و المدرس يطرده بره الفصل...مبقتش حاجه تزعل او حاجه محرجه بالنسبه للطالب صح؟ اهي دي عينه و زي ما بيقولوا...العينه بينه:))

عشان كده لازم من الاساس تختار انت بتففرج علي ايه؟ و بتدي قفاك لمين؟ و نصيحه....متعرضش قفاك للشمس....فالشمس و ان كانت مفيده لكنها ممكن تبقي حارقه قوي:)))))))

طرطشه

شوفت فيديو رهيب و قلت لازم اكتب عنه...inspiring جدا زي ما بيقولوا...الراجل ده فاجئني و ثبتني في نفس ذات اللحظه بجد...انا متاكده ان اي حد هيشوف الفيديو هيتفاجئ من القوه و الثقه و النصر الي  ويل سميث  (will smith) بيتكلم فيها....باختصار شديد هو شايف انه عايش حياه راااااااااااااائعه و سعيده جدا و عشان كده عاوز يشارك الناس اسباب التميز الي هو عايشه...و الفكره دي في ذاتها جميله و تحسسك انه بقي عامل زي الكوبايه الي اتملات علي اخرها و بدئت تدلق لبره... تطرطش علينا يعني:)

الراجل بيقول كذا حاجه قويه جدا..بيقول ان الواحد لازم يفرق بين الموهبه و المهاره....المهاره دي مكتسبه من التمرين و انك ممكن تكون موهوب اكتر من الاخرين بس التمرين و التدريب ممكن يخالوهم يتفوقوا عليك...الكلام ده و ان كان ناس كتيره تعرفه الا انك لما تسمعه من واحد هو بمقايسه و بمقايس ناس كتيره ناجح جدا تحس بالتشجيع كده و انك ممكن تحقق ال انت عاوزه حتي لو انت مش موهوب قوي فيه.... بالتدريب ممكن تحقق اي شئ باذن الله:)... حبة تفائل يا هندسه:))))

كمان نبرة الثقه الي بيتكلم بيها هزتني قوي...لو دخل في تحدي مع واحد علي مشايه رياضيه treadmill هو هيكون واثق من حاجتين:

1. ان الواحد ده هو الي هينزل الاول

2. انه مش بس هيكمل مشي لا هو كمان هيموت علي المشايه:))))

ده ممكن نترجمه الي معنايين: انه مش بيستسلم و المعني التاني انه هيفضل يشتغل لحد ما يموت علي الطريق....قوه قوه قوه في الاراده فظيعه.... و انا لاحظت ان صفة الاصرار دي عند اغلب لو مش عند كل واحد ناجح... كل ما اقراء قصة حياة اي واحد متميز لازم تلاقي عنده اصرار قوي...... 

حاجه كمان بيقول ان العظمة دي جوه كل واحد مننا, طبعا قصده القدره...و الا هو ميعرفش ان كل مصري جواه عظمه علي عظمه يا ست:)....المهم ان الناس بتبقي متخيله انه عشان توصل للنجاح و التميز لازم تبقي تمر بحاجه صعبه و معقده اكيد يعني مش هتلاقيها علي الرصيف و انت ماشي:)....بس سميث بيتحفنا و بيقولنا ان النجاح سهل و موجود جوه كل واحد مننا..... الاراده و القدره علي النجاح....ابحث بداخلك هتلاقي كل ما تحتاج عشان تنجح... و يبقي فقط الاستعانه بالله... 

اكتر حاجه وجعتني و بنشوفها في الواقع كتير....لما قال: الي مقتنع انه قادر و الي مش مقتنع انه يقدر...غالبا كلاهما علي حق!....ايوه فعلا ده صحيح...غالبا الي بيقول هعمل ان شاء الله بيعمل و الي بيقول مينفعش و معرفش هو ده اخره فعلا....الي بييئس قوام قوام بيفوته كتير قوي...

اخر مقوله هنقلهالكم: بلاش يبقي عندك خطه تانيه plan b عشان ده بيشوش علي الخطه الرئيسيه plan a... بس انا مش مقتنعه بكلامه 100 في100....لكن طبعا ساعات فكرة الخطه التانيه دي بتخاليك تفكر كتير قوي هتعمل ايه لو فشلت في اول خطوه و بالتالي ممكن فعلا تخاليك تفكر في معني الفشل كتير......بس واقعيا هو برضو لازم يكون عندك خطه تانيه و ده رايي....

بس كده:) و ان كنت مش من هواة الفن لكن كنت بنقل لكم بعض ما طرطش علينا بيه احدهم:)))

*عفوا كلامي عن ويل سميث لا يعني موافقتي علي مشاهدة افلامه!